1. juli 1888 fekk Eksingedalen sin eigen postopnar. Postopneriet låg på Flatekvål, og fyrste postopnar var Joannes H. Flatekvål (1830-1909) bonde bruk 1 - løn kr. 10 i året. Eidslandet kom etter med postopneri 1. januar 1892 med postopnar handelsmann Anders Hanssøn Lillejord.

1. januar 1942 blei postadresse Eksingedalen flytta frå Flatekvål til nyopna postopneri på Lavik. Jordmor Frida Brekke var fyrste postopnar her. Samtidig skifta postopneriet på Flatekvål navn frå Eksingedalen til Flatekvål. Hårek Flatekvål var postopnar på denne tida.

18. mars 1968 blei det innført postnummer i Norge. Eksingedalen fekk då postnummer 5296, Flatekvål fekk 5295 og Eidslandet fekk 5294.

1. februar 1969 blei postopneriet på Flatekvål nedlagt. Postadressa 5295 Flatekvål opphøyrde. Hallstein Flatekvål var siste postopnar. Postadressa Eksingedalen levde vidare i og med at den var flytta til Lavik i 1942.

Etter 88 år blei så postadresse Eksingedalen borte då postopneriet på Lavik blei nedlagt 31. juli 1976 og 5296 Eksingedalen opphøyrde. Agnes Haugen fungerte på denne tid som postopnar etter at mannen Anton døydde i 1972. Adressa til Eksingedølane blei no 5294 Eidslandet.

8. januar 1997 blei også postopneriet på Eidslandet nedlagt. Postadresse 5294 Eidslandet blei imidlertid vidareført. Landpostbod sto no for post-tenesta.

1. mars 1999 var det ein større omlegging av postnummer-systemet i Norge. 650 000 adressentar fekk nytt postnummer, blant anna Eksingedølane som no fekk 5728 Eidslandet. Denne postadressa har dei framleis.

Kjelder: Postmuseet og Bygdebok for Modalen herad band 2.