გია მურღულიამ ივანე ჯავახიშვილის სახელობის თბილისის სახელმწიფო უნივერსიტეტის ფილოლოგიის ფაკულტეტი დაამთავრა. პედაგოგიური მოღვაწეობის პარალელურად, სამეცნიერო და ლიტერატურულ საქმიანობას ეწევა. გამოცემული აქვს წიგნები ,,საუბრები ძველ ქართულ ლიტერატურაზე", ,,ფიქრი განათლებაზე", იგავების კრებული ,,სიბრძნე მინიატურაში", ,,საუბრები უფროსკლასელებთან", ასევე, რამდენიმე თვის წინ შედგა მისი ახალი წიგნის ,,ცხრის ნახევარზე" პრეზენტაცია. ავტორის თქმით, ამ წიგნზე მუშაობის დროს ცდილობდა გულწრფელი ყოფილიყო ახალგაზრდებთან, გაეზიარებინა მათთვის ფიქრის ხიბლი და მნიშვნელობა.
პროფესიის არჩევის დროს გეზის მიმცემი გია მურღულიას მასწავლებელი მამუკა ოჩიგავა აღმოჩნდა. მისი თქმით ამ ადამიანს ცოდნა, გემოვნება და პრინციპებიც ჰქონდა.
,,ადამიანმა მთავარია განავითაროს არჩევანის და ალგორითმის გააზრების კულტურა''
სამომავლო მიზნების არსებობა და მათი თანმიმდევრულობა, თითოეული ჩვენგანისთვის ძალიან მნიშვნელოვანია. ფილოლოგი ბართაშვილის სიტყვებს იხსენებს ,,ადამიანი არის აღუვსებელი საწყაული“, სასურველ მიზანს, რომ მიაღწევთ იქ ჩნდება ახალი გამოწვევები და მისწრაფებები.
,,ადამიანმა მთავარია განავითაროს არჩევანის და ალგორითმის გააზრების კულტურა. არსებობს მიზნები, რომლებთანაც ერთი ნაბიჯით ვერ მიხვალ, ამ დროს აუცილებლად უნდა გათვალოთ ნაბიჯთა თანმიმდევრობა და დრო. მე ვცდილობ ასე მოვიქცე ხოლმე და უმრავლეს შემთხვევაში ამართლებს“.
ბავშვობა
,,სჯობს არგუმენტება იჩხუბოს ვიდრე ადამიანებმა"
პროფესიიდან გამომდინარე, ხშირად აქვს შეხება მოსწავლეებთან. საერთო ინტერესების გამონახვა მოზარდებთან ურთიერთობის დროს მნიშვნელოვანი იარაღია. პედაგოგის თქმით, აუცილებელია ნდობის მოპოვება, რომელიც ორმხრივი უნდა იყოს და ეფუძნებოდეს სამართლიანობას. მის პრაქტიკაში ყოფილა ისეთი შემთხვევებიც, როდესაც მოსწავლესთან საერთო ენა ვერ გამოუნახია, ასეთ დროს მისთვის მხოლოდ ერთი გამოსავალი არსებობს.
,,არ უნდა შეეცადო, რომ ბავშვი დაჩაგრო, საერთო ფიქრამდე უნდა მიხვიდეთ. შესაძლებელია კამათის ორივე მონაწილე საკუთარ აზრზე დარჩეს, მაგრამ ამ დროს არ უნდა დაიკარგოს კეთილგანწყობა. სჯობს არგუმენტებმა იჩხუბოს, ვიდრე ადამიანებმა.“
,,უგემოვნობა აფუჭებს ფიქრს, საქციელს და ყველაფერ დანარჩენს”
,,სათქმელის გამოხატვას გარდა ნიჭიერებისა, ორგანიზაციული კულტურა და ესთეტიკაც სჭირდება, როცა ვფიქრობ, გემოვნება მთავარი სიტყვა მგონია ხოლმე. უგემოვნობა აფუჭებს ფიქრს, საქციელს და ყველაფერ დანარჩენს.”
საზღვარგარეთის ლიტერატურა
მისი ყურადღების მიღამა არ რჩება უცხოური ლიტერატურაც. ძალიან მოსწონს მცირე ფორმატი. მიაჩნია, რომ მოთხრობის განხრით აკუტაგავას და ბორხეს ვერავინ შეედრება. რომანებს რაც შეეხება, გამოარჩევს ლათინო ამერიკის დიდ რომანისტებს: მარკესს, ლიოსას და ხულიო კორტასარს. ფიქრობს, რომ პოეზიაში იაპონელები, ჩინელები და ირანელები არავის დაუთმობენ მცირე ფორმატში ლიდერობას.
,,კეთილდღეობა, სამართლიანობა და გონიერება"
,,სამი არის მოყვრისაგან მოყვრობისა გამოჩენა:
პირველ, ნდომა სიახლისა, სიშორისა ვერ-მოთმენა,
მიცემა და არას შური, ჩუქებასა არ-მოწყენა,
გავლენა და მოხმარება, მისდა რგებად ველთა რბენა.“
,,რა კაცია ის, ვინც სამყაროს შეცვლას არ ცდილობს“
თ ა ვ ი ს უ ფ ლ ე ბ ა
გია მურღულიას დამოკიდებულება თავისუფლების მიმართ ძალიან საინტერესოა, ის იხსენებს ეგზისტენციალისტების აზრს, რომ ,,ადამიანი დაწყევლილია თავისუფლებით“.
ფიქრობს, რომ ,,ადამიანებს ძალიან მოსწონთ იმის კეთება რაც უნდათ, მაგრამ მეორე მხრივ ჩვენს გადაწყვეტილებებს და ქცევას ახლავს პასუხისმგებლობა, ეს არ მოსწონს ათიდან ცხრას.“
დედა
გია მურღულიას ცხოვრებაში მნიშვნელოვანი პიროვნება იყო დედა. ეს ცისფერთვალება ქალბატონი მისთვის ყველაზე ლამაზი და სათნო ქალია. სიცოცხლის ბოლო წუთებში დედის სარეცელთან მჯდომ გია მურღულიას ერთ ხელში დედის დაუძლურებული დამჭკნარი ხელი ჰქონდა, მეორეში მისი შვილიშვილის, რომელიც მოულოდნელად აღმოჩნდა მის გვერდით. სწორედ ამ დროს გაიაზრა მან, რომ რაღაც მნიშვნელოვანი ამბავი ხდებოდა და გადაწყვიტა ლექსი დაეწერა, რომელსაც ჰქვია ,,ხელები“.
,,ხელები"
,,დედაჩემს სძინავს და სიკვდილს ელის
ვიცი, ხვალ უკვე აღარ იქნება
უსაყვარლესი, დამჭკნარი ხელი,
ჩემს ხელში რაღაც ცივად ინთქმება,
პატარა გოგო, მძაფრ სევდას შველის
ჩემი უფროსი შვილის ნაყოფი,
ხელში მიჭირავს მე მისი ხელიც
უკვდავებისთვის უხვად სამყოფი,
მათი მშვენების სიმაღლე ქორის
უცივეს დროში საბნად მეხურა
შეიფრთხიალებს, ამ ორ ხელს შორის
ჩემი სიცოცხლის ჩიტი ბეღურა.“
მასალა მოამაზადა, გრიგოლ რობაქიძის უნივერსიტეტის, ჟურნალისტიკისა და მასობრივი კომუნიკაციების მეორე კურსის სტუდენტმა - რუსუდან შანთაძე.
ხელმძღვანელი - ლიანა მარქარიანი